| Sumario: |
O 16 de decembro de 1958 morría en Polonia Sofía Casanova, escritora e correspondente de guerra galega que, ademáis de legarnos unha importante obra literaria e xornalística, estivo presente nalgúns dos acontecementos máis importantes do século XX, incluídas as dúas Revolucións Rusas e as dúas Guerras Mundiais. Sofía tiña por costume escribir parte dos seus pensamentos nuns cadernos que gardaba coidadosamente no interior dunha maleta de coiro. O día da súa morte, está maleta desapareceu sen deixar rastro. E con ela, fíxoo tamén a verdade sobre Sofía Casanova. Un grupo de testemuñas pertencentes ao mundo da universidade, a cultura e a política, así como algunhas das persoas que tiveron contacto máis ou menos directo con Sofía Casanova, reconstrúen na actualidade a súa vida tratando de respostar á pregunta: “¿quen é Sofía Casanova?”. A viaxe comeza o día do seu nacemento en 1861 na Coruña e conclúe coa súa morte, con máis de noventa anos, en Poznan. Durante todo este tempo acompañaremos a Sofía e a súa fiel escudeira, Pepiña, ao longo dun periplo entre a realidade e a ficción, no que haberá guerras, viaxes, conspiracións, tramas de espionaxe, sectas feministas, cinefilia, romances imposibles, milagres, literatura, adulterio, enfermidades mentais, muiñeiras, emisoras hippies e mesmo pelexas estilo John Ford na metade da Coruña. Todo para chegar á fin do camiño sen que exista unha resposta definitiva que nos permita coñecer a verdadeira Sofía Casanova, posto que as visións existentes sobre a súa vida, xa de por si bastante distorsionada polo mito, resultan moi diverxentes e en certos casos ata contradictorias. Só A Maleta de Sofía parece ter a clave, claro que tal vez esa clave, non sexa a que todos os seus partidarios e detractores estaban agardando...
|
