| Sumario: |
Alén mundo é a obra coa que Paco Rivas pretende trasladar ao lector/a a ese mundo lúgubre que se agocha na noite e na morte. É por iso a razón deste título, Alén mundo, unha expresión que se refire ao sobrenatural, ao máis alá... ao alén. Para elo, sérvese dun acompañamento gráfico capaz de suscitar ese desacougo que desprenden os relatos recompilados, grazas á mestría do artesán e ilustrador Alfonso Otero Regal. Este libro componse de catro relatos independentes, pero todos relacionados por un nexo común, o misterio, a intriga e mesmo a morte, aínda que a súa presenza se camufle entre escuras neboeiras só iluminadas por esplendores momentáneos de luz baixo a aparencia de lóstregos. Vedoira, O Verdugo, Ridó e O renacer de Isolino son as historias que compoñen esta obra, un debuxo literario de noites fantasmagóricas e espazos medorentos nos que coa chegada do luar nos invade o desacougo, o medo ao descoñecido. Mais nada mellor que mergullarse nesas sombras, nese pavor ao mundo das ánimas, tan presentes na tradición oral galega que deben ser tan temidas como respectadas. Percorremos coa lectura eses carreiros bretemosos que nos permitirán chegar ao remate de cada historia sen sufoco, como aquel Un ollo de vidro. Memorias dun esquelete escrito por Castelao, “Alén mundo” lévanos a viaxar e entender á morte sen medo, comprendendo que a vida non se entende sen a propia morte. Nacer para morrer.
|
